Joh 15 | MHL | STEP | “Makena, yo wain nomokowa akena-ke ne yena Auwa-ke wain piita nain urufiya.

John 15

Yeesus-na wain nomokowa akena-ke

1 “Makena, yo wain nomokowa akena-ke ne yena Auwa-ke wain piita nain urufiya. 2 Ekeka eena me makenariya nain os-ke efar irawiya. Ne ekeka makenariya nain kerewa makenarinok naep ekeka eena mua mikomakek nain saliwami urukiya. 3 Nis pun yena opora eena nia maakem nain-ke naap nia saliwap-pueya ikeman. 4 Naapeya ni yena efamiya ikeka ne yo ni niamiya ikainen. Ekeka pia ara-pa mikap makenariya. Onaiw me makenarinon. Ne nis pun naap, yo me efamiya ikowen-na me makenarowen.

5 Yo wain nomokowa pia ara-ke ne ni ekeka-ke. Ne mua eena yo efamiya ikainon-na, ne yo o wameiya ikainen-na, mua nain makena kerewa wuinon. Ni yo efamiya me ikowen-na sira eliwa kuisow me onowen. 6 Ne mua eena yo efamiya me ikaiya nain nomokow ekeka saarik irawiwkin orop ififarinon. Ne ekeka naap nain fiirimep kuumowa-ke. 7 Naeya ni yo efamiya ikok yo opora efar opam-ikowen-na maa mauwa kookalep efa nokariman nain eliw nia asipinen. 8 Ne ni nomokowa makenarem-ikowa saarik naap onam-ikowen-na yena teeria-pa efar ikeman nain ariman niam wuowen. Naeya yena Auwa unum maneka aawinon.

9 Yo yena Auwa efa kookaliya sira naapiw yos pun nia kookaliyem. Yo nia kookaliyem nain naap akena kema suuwam-ikeka, me piipueka. 10 Ne yo opora yookowen-na yo nia kookaliyem nain me piipuowen. Yo yena Auwa opora wiar ookami o efa kookaliya nain me piipuiyem naap.

11 Yena kemelowa nain nis pun niar ikainok, ne ni kemelow manekiw ikeka naep opora unowa fain iiriw nia maakomakem. 12 Ne opora efar ookowa nain feenap, nis pun niam kookalem-ikeka, yo nia kookaliyem naap. 13 Mua eena ona womar eliwa wia kookalowa sira unowa, nain sira manek akena feenap, ona womar epa wiar aawep os-ke uminon. Nain maa maneka-ke. 14 Ne ni yo opora efar miimowen-na yena yomar eliwa nia nainen. Uuwow mua-na ona saria-ke uuwowa muutiw maakiya, ona kema kamenap ikua nain me maakiya, naeya wiar amisarinon. Ni aakisa yena uuwow mua me nia nainen, weetak. Yena yomar eliwa nia naep maa unowa yena Auwa efa maakek nain iiwawun nia maakomakem. 16 Nis-ke me efa pepekimeman, weetak. Yos-ke nia pepekimem, ni ikiwemi anane wain nomokowa saarik naap makenarem-ikeka naep. Ne makena nain anane naap niar ikainok. Naeya ni maa mauwa kookalep yo unuma-pa Auwa efar nokarowen-na eliw nia asipinon. 17 Yo sira kekanowa nainiw nia maakiyem, ni niam kookalem-ikeka.”

Wi miiw mua-ke Yeesus teeria wia iiwuarikuan

18 “Aria wi miiw mua-ke nia iiwuariwkin-na kema suuweka, yookikir naap efa iiwuaremik. 19 Ni miiw fain sira wiar ookekaman-na wi wiena wiam kookalimik naap nia kookalekamik. Nain ni me kakeniw miiwa fain mua-ke, weetak. Ni miiw sira-pa ikaiwkin yena nia nanikap aawem. Naeya nia iiwuarimik.

20 Yo nia maakem nain kema suuweka. Feenap, uuwow mua-ke ona saria nomakep os-ke maneka me ariya, weetak. Naapeya wi yo efa samorimik, aria ikoka nis pun naap nia samorikuan. Ne yo opora efar miimikuan-na aria nis pun naap, opora niar miimikuan. 21 Wi yo muuta nain naap nia onam-ikaikuan. Moram o eena efa sesekak nain me amisaremik. 22 Yo ekapep opora me wia maakekam-na wi pina marew naekamik. Ne wi aakisa pina marew wiam naowa me pepek. 23 Ne mua eena yo efa iiwuariya nain Auwa pun efar iiwuariya. 24 Yo uuwowa oniyem nain mua kuisow-ko me oniya. Me onekam-na wi pina marew naekamik, ne aakisa weetak. Moram yo maa miililina onamkun efar urufamik, nain yena Auwa owawik yia iiwuarimik. 25 Wi sira naap onimik nain Mua Maneka opora iiriw ikua nain makena arowimik, feenap,

‘Onom marew maneka nain efa iiwuaremik.’
(Someka 35.19, 69.4)

26 Yo ikoka Ewar Eliwa sesekamkun oromi ni niamiya ikok nia asipami nia ofakowam-ikainon. Auwa wameiya-pa ikaeya sesekamkun orop opor makena aakunemi yo efa maemi opora efar kekanowinon. 27 Ni iiriw yo uuwowa onoma wuam nain efamiya ikeman nain ekapep aakisa, naapeya nis pun yo efa maemi opora efar kekanowami naap uuwam-miawowen.”